Альварес Boxing News және ESPN рейтингінде Головкиннен кейін екінші орынға жайғасты

Boxing News журналы мен ESPN телеарналары өздерінің ресми сайттарында орта салмақтың жаңартылған рейтингін жариялады, деп жазады Vesti.kz порталы.

Рейтинг 6 мамыр күні Лас-Вегаста Сауль "Канело" Альварес (49-1-1, 34 КО) пен кіші Хулио Сезар Чавес (50-3-1, 32 КО) арасындағы жекпе-жектен кейін өзгерді. Екі мексикалық боксшы арасындағы жекпе-жектің қорытындысы бойынша үш төреші де жеңісті "Канелоға" берді. Ал кездесуді 164,5 фунтта өтті.

Boxing News журналы мен ESPN телеарналарының рейтингі бойынша "Канело" орта салмақтағы WBA (Super), IBO, WBC және IBF тұжырымдары бойынша әлем чемпионы қазақстандық Головкиннен (37-0, 33 КО) кейін екінші сатыға жайғасқан. Бірақ бұған дейін мексикалық боксшы бірінші орта салмақта өнер көрсетіп келген еді.

Бұған дейін Альварестің өзі кіші Чавеспен өтетін кездесуден кейін орта салмаққа ауысатынын мәлімдеді. Өзінің соңғы жеңісінен кейін "Канело" шарша алаңда тұрып, Головкинді жекпе-жекке шақырды. Сөйтіп, Головкин - Альварес жекпе-жегі 16 қыркүйекте өтетіні белгілі болды. НВО арнасы бұл кездесуді PPV арқылы таратады. Алайда қайда өтетіні әзірше нақты белгілі болмай тұр.

Қазіргі таңда Головкин - Альварес жекпе-жегін өткізуге сегіз спорт кешенінен ұсыныс түскен. Олардың ішінде Лас-Вегастағы, Нью-Йорк қаласында орналасқан Madison Square Garden және Далластағы AT&T Stadium стадионы секілді танымал спорт кешендері бар. АҚШ-тан бөлек Ұлыбритания астанасындағы "Уэмбли" және Мехиконың "Ацтек" стадиондары да бұл жекпе-жекті қабылдауға ынталы.

Әлеуметтік желілерде бөлісу