Әшкеев пен Нұрсұлтанов Ковалев-Уорд бокс кешінде жекпе-жек өткізуі ықтимал

Қазақстандық былғары қолғап шеберлері Мадияр Әшкеев (8-0, 4 КО) пен Мейірім Нұрсұлтанов (2-0) америкалық Андре Уорд (31-0, 15 КО) пен ресейлік Сергей Ковалев (30-1-1, 26 КО) арасында өтетін бокс кешінде шаршы алаңға шығуы мүмкін. Бұл туралы Vesti.kz порталына Мадияр Әшкеев айтып берді.

"Ковалев - Уорд жекпе-жек кешінде Мейірім Нұрсұлтанов екеуіміз жекпе-жек өткізуіміз мүмкін. Қазір менеджеріміз Эгис Климас бұл туралы келіссөздер жүргізіп жатыр. Мейірім екеуміз жақын күндері Қазақстанға ораламыз. Жұмыс визамыз аяқталып жатыр. Соны ұзартып, АҚШ-қа қайта келіп, жаттығу жұмыстарына кірісеміз. Бұл мәселенің анық-қанығы келер айдың басында белгілі болып қалады", - дейді Әшкеев.

Айта кетейік, Андре Уорд пен Сергей Ковалев арасындағы екінші кездесуі 17 маусым күні, Лас-Вегас қаласында өтеді. АҚШ жерінде бұл кездесуді НВО арнасы ақылы жүйе арқылы көрсетеді.

Еске салайық, Мадияр Әшкеев өзінің соңғы кездесуін 16 сәуір күні АҚШ-тың Коннектикут штатына қарасты Анкасвилл қаласында өткізіп, америкалық Шон Кэмеронды жетінші раундта техникалық нокаутпен ұтты.

Дәл осы бокс кешінде Мейірім Нұрсұлтанов та шаршы алаңға шығып, мексикалық боксшы Хавьер Ольвераны екінші раундта техникалық нокаутпен жеңді.

Әлеуметтік желілерде бөлісу