"Барыс" бапкері бір-біріне соғылған команда көшбасшыларының жағдайын айтты

"Барыстың" бас бапкері Андрей Скабелка хоккейшілер Брэндон Боченски мен Мэтт Фрэттиннің ойынға оралуы жайында айтып берді, - деп хабарлайды Vesti.kz.

Мұның алдында, жарақат алған екі форвардтың жаттығулар жасай бастағаны хабарланған еді.

"Бәрі жақсы демалды. Тынығуға екі күніміз болды. Кеше мұзсыз күн өтті. Жігіттердің барлығы тынықты. Жарақат алғандар бойынша - Боченски ертең, 9 ақпанда мұзайдынға шығады. Мэттью Фрэттин ертең шыға қоймайтын шығар. Әлі өткізе тұрады. Ауыр жарақат жоқ", - дейді Скабелка.

Еске салайық, 4 ақпан "Салават Юллаевпен" қонақтағы ойында Боченски мен Фрэттин қатты жылдамдықпен соқтығысты да, ойынды жалғастыра алмады. Көшбасшылардың шығып қалуы "Барысқа" овертаймда жеңіске жетуге кедергі болмады - 3:2. Осылайша, астаналықтар Чернышев дивизионында бірінші және Шығыс конференциясында екінші орынды сақтап қалды.

Биылғы ҚХЛ-дегі 51 матчте Фрэттин есебінде 39 (17+22) ұпай, ал Боченскиде - 38 ойында 32 (14+18) ұпай. Бұл маусымда Боченски бұған дейін де жарақат салдарынан бір жарым ай ойынға қатыспаған.

Әлеуметтік желілерде бөлісу