Лондондық "Арсенал" Англия премьер-лигасы 31-турының кейінге қалдырылған матчында сырт алаңда "Вулверхэмптон Уондерерс" клубымен тең түсті - 2:2, деп хабарлайды Vesti.kz.
"Зеңбірекшілер" ойынды қарқынды бастады. 5-минутта Букайо Сака алаң иелерінің қателігін тиімді пайдаланып, есеп ашты. Үзілістен кейін қонақтардың қысымы нәтиже берді - 56-минутта Пьеро Инкапье есепті еселей түсті.
Алайда "қасқырлар" берілмеді. 61-минутта Уго Буэно есеп айырмасын қысқартып, матчқа интрига қосты.
Драмалық сәт қосымша уақытта болды: 90+4-минутта Риккардо Калафьори өз қақпасына гол соғып, қорытынды есепті белгіледі - 2:2.
27 матчтан кейін "Арсенал" 58 ұпаймен турнир кестесінде көш бастап тұр. Ал "Вулверхэмптон" 10 ұпаймен 20-орында қалып отыр.
Келесі турда "қасқырлар" сырт алаңда "Кристал Пэлас" клубымен кездессе, "Арсенал" сырт алаңда "Тоттенхэм Хотспур" командасымен дерби өткізеді. Екі матч та 22 ақпанда өтеді.
Жарнама