Қазақстан чемпионатының ең қымбат футболшысы клубсыз қалды

Сурет: "Шавиш" ФК

"Астана" футбол командасының бұрынғы ойыншысы Ренан Брессан Португалияның жоғары лигасындағы "Шавиш" клубымен келісімшартты үзді, - деп хабарлайды Vesti.kz.

30 жастағы футболшы бұл командаға 2017 жылдың басында келіп, мерзімі 2020 жылға дейінгі келісімшартқа қол қойған. 2,5 маусымда ол 61 матч өткізіп, он гол соққан. Алайда биылғы чемпионатта оның клубы 18 команда арасынан 16-шы болып, бірінші лигаға түсіп қалды.

Қазақстанның футбол сүйер қауымына Брессан 2014 жылы "Астанаға" ауысқаннан бері белгілі. Футболшы ол кезде екі жылдық келісімшартқа қол қойып, Қазақстан чемпионатындағы ең қымбат футболшы есептелген - трансферлік құны 2,3 миллион еуро. Бірақ астаналық команда үшін жарқырай қоймады, ол алты ойында бір ғана гол соқты.

12 шілдеде "Астана" футболшыны барлық негізгі жарыстан алып тастады, ал 29 күні Брессан келісімді екі жақты тоқтатты.

"Астанадан" кетіп, "Шавиш" сапына қосылғанға дейін Брессан португалиялық "Риу Ави" және кипрлік АПОЭЛ үшін ойнады.

Бразилиялық футболшы Беларусь құрамасында екенін айта кетейік, бұл елдің ұлттық командасы үшін ол 2012 жылдың 29 ақпанынан ойнай бастады.

Әлеуметтік желілерде бөлісу