"Челси" Петр Чехті Англия Премьер-лигасына ойнайтын футболшылардың тізіміне қосты

38 жастағы чехиялық қақпашы Петр Чех Лондондық "Челсидің" Англия Премьер-лигасының 2020-2021 жылғы маусымына арналған тізіміне енді.

Қақпашы 2018/2019 жылғы маусымның соңында мансабын аяқтаған болатын. Чех кәсіби мансабының көп бөлігін "Челсиде" өткізді. Қақпашы 2004-2015 жылдар аралығында Лондондық клубтың намысын қорғады. "Көктермен" ол 15 кубок жеңіп алды, соның ішінде төрт Премьер-Лига және Чемпиондар Лигасының жеңімпазы болды. Чех соңғы жылдарын "Арсеналда" өткізді.

"Петр Чех команданың төтенше жағдай туралы өтініміне енгізілді. Бұл коронавирус пандемиясы тудырған бұрын-соңды болмаған жағдайларға байланысты сақтық шарасы болып табылады. Чех ойыншы позициясын келісімшартсыз алды", - деп түсіндірді "Челси" клубының басшылығы.

Қазіргі таңда "Челсиде" Премьер-лига ойындарына шақырылған тағы үш қақпашысы бар - Кепа Аррисабалага, Вилли Кабальеро және Эдуард Менди.

Бес турда сегіз ұпай жинаған "Челси" АПЛ-дің турнирлік кестесінде сегізінші орында тұр.

Әлеуметтік желілерде бөлісу