Жартылай ауыр салмақта жұдырықтасатын қазақстандық кәсіпқой боксшы Али Ахмедов (12-0, 9 КО) 11 қазанда кезекті жекпе-жегін өткізеді. Геннадий Головкиннің командасында жаттығатын боксшының қарсыласы - мексикалық Джовани Хавьер Гомес (17-14, 11 КО).
23 жастағы қазақстандық АҚШ-тың Коста-Меса қаласында өтетін бокс кешінде 8 раундтық жекпе-жекте жұдырықтасады. Оның қарсыласы 2007 жылдан бері 31 кездесу өткізген. 17 жекпе-жекте қарсыласын жеңіп, 14 кездесуінде жеңілген екен.
Ал Али Ахмедов жастар арасында WBC чемпиондық атағына ие. Ахмедов соңғы рет 8 тамызда жұдырықтасқан, ол кезде Голливудта өткен "Hollywood Fight Nights 2" бокс кешінің басты кездесуінде америкалық Хорхе Эскалантені төртінші раундта нокаутқа түсірген еді. Бұл жекпе-жекке қазақстандық боксшыны Абель Санчес пен Головкиннің егізі Максим алып шыққан болатын. Кейіннен боксшы Головкин негізін қалаған GGG Promotions промоутерлік компаниясымен келісімшартқа қол қойғанын хабарлаған болатын.
Жарнама