Головкин реванш алдында төрешілерге қатысты пікір білдірді

Геннадий Головкин. Фото: reviewjournal.com

WBC, WBA (Super) және IBO тұжырымдары бойынша орта салмақтағы әлем чемпионы қазақстандық Геннадий Головкин (38-0-1, 34 КО) 15 қыркүйекте мексикалық Сауль "Канело" Альвареспен (49-1-2, 34 КО) өтетін реванш алдында мексикалықтың жекпе-жекте қолын бинтпен орауы мен төрешілік жайлы пікір білдірді, - деп хабарлайды Vesti.kz.

"Альварестің қолы қалай оралғанын көре алмадым. Оның қолы бинтпен нақты қалай оралғанын білмей жұдырықтастым", - деді Головкин телефон арқылы өткен баспасөз-конференциясы барысында. - Судьялар жайлы айтатын болсақ, біз оларға әсер ете алмаймыз. Біз тек олар тек әділ шешім қабылдайды деп үміттенеміз. Осыған дейінгі төрешілерге қарағанда білікті және адекват болады деп сенемін".

Басылымның мәліметінше, Альварестің жекпе-жек кезінде қолын бинтпен орауы мәселесін Головкиннің бапкері Абель Санчес көтерген. Санчес мексикалықтың бірінші жекпе-жек кезінде заңсыз әдісті қолданғанын айтқан. Алайда Неваданың комиссия өкілдері "Канело" мен оның бапкерлерінің әрекетінде ереже бұзушылық анықтамаған.

Еске салайық, Головкин мен Альварес арасындағы алғашқы жекпе-жек 2017 жылы 16 қыркүйекте Лас-Вегаста өтіп, судьялар кездесуді тең есеппен аяқталды деп мәлімдеген болатын.

Әлеуметтік желілерде бөлісу