Головкин - "Канело" қарымтасының төрешілері белгілі болды

Невада штатының Атлетикалық комиссиясы (NSAC) WBC, WBA (Super) және IBO чемпионы қазақстандық Геннадий Головкин (38-0-1, 34 КО) мен мексикалық Сауль "Канело" Альварес (49-1-2, 34 КО) арасындағы қарымта жекпе-жектің төрешілері мен рефериін ресми түрде атады.

Рингтегі рефери америкалық кіші Бенджи Эстевес. BoxRec мәліметінше, ол 636 жекпе-жекте рефери болған. 1954 жылы дүниеге келген Эставес Нью-Йорк тұрғыны. Бұл кәсіппен 1982 жылдан бері айналысып келеді. Осы уақытта ол кіші Флойд Мейвезер, Костя Цзю, Артуро Гатти, Бернард Хопкинс, Шейн Мозли, Келли Павлик және басқа атақты боксшылардың жекпе-жегіне рефери болған.

Қарымта төрешілері америкалық Дэйв Моретти, Гленн Фельдман және Стив Вайсфельд болады. Бұл үш төреші Сергей Ковалев (32-3-1, 28 КО) және Андре Уорд (32-0, 16 КО) жекпе-жегіне бірге қатысқан.

"Канелоның" уақыты келді". Мексика боксының аңыздары Альварес Головкинді жеңіп, тарихқа енетінін айтады

1977 жылдан бері Моретти 988 жекпе-жекке төрелік етті. Фельдман бұл кәсібін 1992 жылы бастады және 982 жекпе-жекке қатысты, ал Вайсфельд 1991 жылдан бері 1759 жекпе-жекте төреші болған екен.

Еске салайық, Головкин мен Альварестің алғашқы жекпе-жегінде рингтегі рефери Кенни Бейлесс, ал төрешілер Дэйв Морретти, Дон Трелла және Аделаида Берд болған.

Ол кезде Моретти жеңісті Головкинге берді - 115-113, Трелла боксшыларды тең қойды - 114-114, ал Берд Альваресті жеңімпаз деп таныған - 118-110 және осының салдарынан үлкен сынға қалды.

15 қыркүйекте Головкин мен Альварес Лас-Вегастағы T-Mobile аренасына қайта оралып, жеңімпазды анықтайды. АҚШ-та бұл жекпе-жек HBO ақылы трансляциялар жүйесі арқылы көрсетеді.

Әлеуметтік желілерде бөлісу