Еуропа лигасының ширек финалындағы бірінші ойындар өтті

rbc.ua

Түнде футболдан Еуропа лигасының ширек финалындағы бірінші ойындар өтті. Назарларыңызға ойындарға қысқа шолуымызды ұсынамыз.

Осы маусымдағы Еуропа лигасының басты фавориттерінің бірі болып саналатын ағылшындық "Манчестер Юнайтедке" ширек финалда Бельгияның "Андерлехт" командасы қарсылас атанған еді. Түнде өткен бірінші ойында командалар 1:1 есебімен тең тарқасты. Ойында қызыл сойқандар сапынан Генрих Мхитарян, ал алаң иелері қатарынан Дендокер гол соқты.

Амстердамның "Аякс" футбол клубы өз алаңында Гельзенкирхеннің "Шальке" командасынан 2:0 есебімен басым түсті. Ойында Дэви Классен дубль орындады.

Вигоның "Сельта" футбол клубы ширек финалдағы бірінші ойында "Генкті" 3:2 есебімен ұтты. Ойында испандық ұжым сапынан Систо, Аспас пен Гвидетти гол соқса, бельгиялық команда қатарында Боэтиюс пен Буффель бір-бір голдан еншілеріне жазды.

Лиондағы "Лион" мен "Бешикташ" командалары арасындағы ойын 1 сағаттай уақыт кешігіп басталды. Бейресми деректер бойынша түрік жанкүйерлері жоғарғы трибуналардан жергілікті жанкүйерлерге тез тұтанатын жарылғыш заттар лақтырған. Ал бас сауғалаған жанкүйерлер алаңнан бір-ақ шықты. Нәтижесінде стадиондағы келеңсіздіктер 1 сағат ішінде қалпына келтірілді.

Ойында 2:1 есебімен "Лион" жеңіске жетті. Бірінші болып 15 минутта Райан Бабел "Бешикташты" алға шығарғанмен, ойын соңына қарай қақпаларына екі бірдей гол өткізіп алды. Толиссо мен Морельдің голдары алаң иелеріне жеңіс сыйлады.

Командалар арасындағы қарымта ойындар 1 аптадан кейін өтеді.

Әлеуметтік желілерде бөлісу