Жанқош Тұраровқа НВО ұсыныс жасады

zhusan.kz/Женис Ыскабай

Қазақ кәсіпқой боксшысы Жанқош Тұраровқа НВО ұсынысы түсті. Бұл туралы бүгін боксшының промоутері Нельсон Лопес айтты.

- Біз 9 қыркүйек күні Астанада екі чемпиондық жекпе-жек өткізуді жоспарлаған едік. Қанат Ислам мен Брэндон Кук бірінші орта салмақта WBO NABO және WBA Inter-Continental чемпиондық атақтарына таласса, Жанқош Тұраров та чемпиондық жекпе-жек өткізсе деп едік. Бірақ Жанқоштың қарсыласының салмағы сәйкес келмеді. Нәтижесінде кәдуілгі кездесу болып қала берді.

Дегенмен бізге НВО-дан ұсыныс түсті. Олар Жанқош Тұраровты өз бокс кештерінде көргісі келеді. Алдағы уақытта Жанқоштың чемпион атануға қабілеті жететінін көріп жүрміз. Ол – еңбекқор боксшы, - деді мексикалық промоутер.

9 қыркүйектегі бокс кеші Астанадағы республикалық "Сарыарқа" велотрегі кешенінде өтеді. Сондай-ақ бұл бокс кешінің андеркардында Қанат пен Жанқоштан өзге 7 қазақстандық боксшы өнер көрсетеді. Олар — Жәнібек Әлімханұлы (1-0, 1 КО), Мейірім Нұрсұлтанов (3-0, 2 КО), Руслан Мырсатаев (3-0, 3 КО), Әли Ахмедов (7-0,5 КО), Айдос Ербосынұлы (6-0, 6 КО), Димаш Ниязов (11-0-3, 5 КО) және Нұрсұлтан Жаңабаев (2-0, 1 КО). Барлық боксшыларымыз осы уақытқа дейін бірде-бір рет жеңілмеген.

Әлеуметтік желілерде бөлісу