Дычконың бапкері келесі жекпе-жек қашан өтетінін және неге осынша үзіліс болғанын түсіндірді

Иван Дычко. Фото ҚР Кәсіпқой бокс федерациясынан

Қазақстандық ауыр салмақтағы боксшы Иван Дычконың бапкері Дерек Сантос-Россарио боксшының келесі жекпе-жегі желтоқсанда болатынын айтты. Америкалық маман ресейлік кәсіпқой боксшы Сергей Ковалевтің бапкері болғанын айта кетейік.

"Иван қазір жақсы жаттығып жатыр және келесі жекпе-жекке дайын. Мен нақты күні мен қарсыластың кім болатынын білмеймін, бірақ, оның желтоқсанда жұдырықтасатыны белгілі.

Жыл соңына дейін екі жекпе-жек өткізе алады дегенге сенімді емеспін. Соңғы жекпе-жегінің алдында құлағында инфекция болды. Құлағына су жиналған. Дәрігер желтоқсанға дейін емделу керек деді.

Жалпы Иванның денсаулығы жақсарып келеді. Ол тез үйренеді және биомеханикасы бұрын мен жаттықтырған боксшылардан жақсы. Келесі жекпе-жектен кейін ол үйіне барғысы келеді, сосын мерекелерден кейін жаттығуларын жалғастырады", - дейді Сантос.

Мұның алдында боксшының менеджері Зия Алиев Дычко жыл соңына дейін төрт жекпе-жек өткізе алады деп мәлімдеген. Қазір Дычконың кәсіпқой бокста екі жеңісі бар.

Айта кетейік, KnucklesandGloves.com және TheFightCity.com америкалық порталдарының шолушысы Патрик Конор жекпе-жектердің жиілігі қауіпті деген болатын.

Әлеуметтік желілерде бөлісу