Арман Рысбек Иван Дычконың қатысуымен өтетін бокс кешінде шаршы алаңға шығады

Сурет Facebook желісінен алынды

"Астана арландары" сапында жүріп Бүкіләлемдік бокс сериясының (WSB) чемпионы атанған орта салмақта өнер көрсететін 26 жастағы қазақстандық боксшы Арман Рысбек 1 желтоқсанда кәспқой рингке бірінші рет шығады, - деп хабарлайды Vesti.kz.

Рысбек өзінің бірінші жекпе-жегін Тампа қаласында өткізеді. Бұл бокс кешінде тағы бір қазақстандық Иван Дычко да (2-0, 2 КО) жұдырықтасады.

"Арман Рысбек осы жұмада Тампа қаласында USF Sundome аренасында шаршы алаңға шығады. Келіп, қазақстандыққа қолдау білдіріңіздер", - деп жазды әлеуметтік желіде боксшының менеджері Фархад Шарипов.

Рысбектің қарсыласы 26 жастағы Дональд Джексон (0-1). Жекпе-жек төрт раундтан тұрады.

Рысбектің екінші жекпе-жегі де қашан өтетіні белгілі. Ол 2018 жылы 27 қаңтарда Орландода 27 жастағы Эштон Сайкспен жұдырықтасады. Бұл кездесуде әйгілі Флойд Мейвезердің інісі 30 жастағы Джастин Мейвезер Джонс (3-0, 3 КО) шаршы алаңға шығады.

Осыған дейін Арман Рысбек кәсіпқой рингтегі мақсаты және Геннадий Головкин секілді әлем чемпионы атануды көздейтінін айтқан еді.

Әлеуметтік желілерде бөлісу