Қанат Ислам жаттығу кезінде жарақат алып қалды

Қазақстандық кәсіпқой боксшы Қанат Ислам АҚШ-ғы оқу-жаттығу жиындары кезінде жарақат алып қалды, - деп хабарлайды Vesti.kz тілшісі.

Qazaq-тың кезекті жекпе-жегі 23 маусым күні өтуі мүмкін деп күтілген еді. Алайда отандасымыз аяғынан жарақат алып, жаттығуын тоқтатты. Емделуге 1 айдай уақыт қажет екен.

Қанат алдағы кездесуінде мексикалық Фернандо Каркамо (23-8, 18 КО), жапон Йошихиро Камегаи (27-4-2, 24 КО) немесе америкалық Габриэль Росадомен (24-11, 14 КО) жұдырықтасуы мүмкін деп күтілген еді.

Айта кетейік, Қанат Ислам ақпан айында танымал менеджер Эгис Климаспен келісімге келіп, АҚШ-тағы жаттығуын бастаған еді.

Қанат 2011 жылдан бері кәсіпқой бокста қазақ елінің атынан бақ сынап келеді. Ал оған дейін Қытай елінде жүріп Олимпиада ойындарының (2008 ж) және әлем чемпионатының (2007 ж) қола жүлдегері атанды.

Қазақ боксшысы соңғы кездесуін 2017 жылдың 9 қыркүйегінде Астана қаласында өткізіп, канадалық Брэндон Кукты (18-1, 11 КО) тоғызыншы раундта техникалық нокаутпен жеңген еді. Осылайша отандасымыз WBO NABO және WBA Inter-Continental чемпиондық белбеулерін сақтап қалған-ды.

Әлеуметтік желілерде бөлісу