"Канело" келесі кездесуін қашан өткізетінін хабарлады

Reuters©

Мексикалық боксшы Сауль "Канело" Альварес (49-1-2, 34 КО) қазақстандық Геннадий Головкинмен (37-0-1, 33 КО) екінші кездесуден бас тартқаннан соң келесі кездесуін қашан өткізетінін хабарлады, деп жазады Vesti.kz порталы.

Баспасөз жиыны кезінде Альварес келесі кездесуін тамыз немесе қыркүйек айында өткізуге үміттенім отырғанын айтты. Оның айтуынша, толық ақталып болған соң Головкинмен екінші рет кездескісі келеді екен.

Еске салайық, ақпан айында Альварестің екі допинг сынамасы кленбутерол дәруменіне оң нәтиже беріп, Невада штатының Атлетер комиссиясы (NSAC) оны уақытша жекпе-жектерден шеттетті. Оның ісіне байланысты тыңдалым 18-сәуірде өтеді. Мексикалық боксшы бір жылға бокстан шеттетілуі мүмкін.

Головкин болса бәрібір 5-мамыр күні жекпе-жек өткізеді. Қазіргі уақытта отандасымызбен кездесу өткізуге бірнеше боксшы дайын екенін айтты. Олардың қатарында америкалық боксшылар Джермалл Чарло, Деметриус Андраде, украиналық Сергей Деревянченко, ирландиялық Гэри О'Салливан, бразилиялық Ямагучи Фалькао, екінші орта салмақтағы WBO чемпионы Хильберто Рамирес және кіші Хулио Сезар Чавес бар.

Головкин мен Альварес арасындағы бірінші кездесу 16-қыркүйек күні Лас-Вегастағы T-Mobile спорт кешенінде өтіп, тең аяқталған болатын. Бірақ бұл кездесудің нәтижесімен бірнеше бокс маманы келіспейтінін де айтты.

Әлеуметтік желілерде бөлісу