Головкин мен "Канело" арасындағы екінші кездесудің қашан басталатыны белгілі болды

©: reviewjournal.com

2018 жылдың 5 мамырында орта салмақтағы WBA (Super), IBO, WBC және IBF тұжырымдары бойынша әлем чемпионы қазақстандық Геннадий Головкин (37-0-1, 33 КО) мен мексикалық Сауль "Канело" Альварестің (49-1-2, 34 КО) қатысуымен өтетін бокс кешінің нешеде басталатыны белгілі болды.

BoxingScene.com порталының мәліметі бойынша, бұл бокс кешіндегі НВО арнасы тікелей эфирде көрсететін кездесулер Солтүстік Америка уақыты бойынша 20:00-де басталады. Ал Астана уақыты бойынша 6 мамыр таңғы 07:00-де көрсетіледі.

Жекпе-жектің өтетін жері әлі белгісіз. Кездесуді қабылдауға Лас-Вегас (T-Mobile Arena) және Нью-Йорк (Madison Square Garden) басты үміткер. Головкиннің промоутері Том Леффлердің айтуынша, бұл сұрақ алдағы екі-үш аптада шешіледі.

Алдағы кездесуде Головкин өзінің барлық чемпиондық белбеулерін ортаға тастаса, Альварес The Ring журналының чемпиондық белбеуін ортаға қояды.

Еске салайық, Головкин мен Альварес арасындағы бірінші кездесу өткен жылдың 16 қыркүйегінде Лас-Вегаста өтіп, тең аяқталды. Осылайша қазақстандық боксшы барлық чемпиондық атақтарын сақтап қалды.

Әлеуметтік желілерде бөлісу