Головкин жыл соңында World Boxing Super Series жобасының жеңімпазымен кездесуі мүмкін

©:vk.com/ggolovkin

Орта салмақта WBA (Super), IBO, WBC және IBF тұжырымдары бойынша әлем чемпионы қазақстандық Геннадий Головкин (37-0-1, 33 КО) екінші орта салмақтағы World Boxing Super Series (WBSS) жобасының жеңімпазымен кездесуі мүмкін.

Бұл туралы Boxingnews24.com порталына қазақстандық боксшының промоутері Том Леффлер айтып берді. Жекпе-жек Ұлыбританияда өтуі ықтимал. Дегенмен жекпе-жек тек жыл соңында ғана өтуі мүмкін. Өйткені, сол кезде бұл жобаның жеңімпазы анықталады.

Басылымның жазған мәліметі бойынша, жобаның жеңімпазы британдық боксшылардың бірі болуы мүмкін. Айта кетейік, бұл жобаның бірінші жартылай финалында британдық боксшылар кіші Крис Юбенк (26-1, 20 KO) пен Джордж Гроувз (27-3, 20 KO) кездеседі. Кездесу 17 ақпан күні Манчестер қаласында өтеді.

Ал екінші жартылай финалда Каллум Смит (23-0, 17 KO) пен Юрген Бремер (49-3, 35 KO) қолғап түйістіреді. Олардың жекпе-жегі 24 ақпан күні Германияда болады.

Кіші Юбенк негізі 2016 жылы Головкинмен кездесуі мүмкін деген әңгіме шыққан. Бірақ ол жолы екі боксшының командалары келісе алмады. Нәтижесінде Головкин екінші бір британдық боксшы Келл Брукпен кездесті. Брук бұл кездесуге қатысу үшін салмақ та ауыстырды. Ал жекпе-жек Головкиннің нокаутымен аяқталды.

Гроувз да Головкинмен жақсы таныс. Өткен жылы олар Спарринг өткізген болатын.

Әлеуметтік желілерде бөлісу