Бейбіт Шүменов Қанат Исламмен бірге жасап жатқан жұмысы туралы айтып берді

Қазақ боксы тарихында тұңғыш рет екі салмақ бойынша әлем чемпионы атанған Бейбіт Шүменов (17-2, 11 КО) Vesti.kz порталының тілшісіне Қанат Исламмен (25-0, 20 КО) бірге жасап жатқан жұмысы және алдағы жоспарлары туралы айтып берді. 

Еске салайық, желтоқсан айының басында Қанат Ислам Шымкентте Бейбіт Шүменовтың бастамасымен жаттыққан еді.

- Біз Қанатпен 2001 жылдан бері дос болып келеміз. Мен жуырда Мәскеуде бір шаруларыммен болған едім. Сол кезде ол маған қоңырау шалды. Қазір оның промоутері және бапкерімен бір түсініксіз жағдай болып жатыр. Ол мені Алматыға шақырды. Мен бір күнге Алматыға ұшып келдім. Сөйлесіп алдық. 

Әрине, Қанат менің досым. Сондықтан оған көмек беруден ешқашан қашпаймын. Қолымнан келгенше көмектесемін. Промоутері және бапкерімен болып жатқан мәселелерді шешуге. Тәжірибемен де алмасып алдық. Оған менің методикам ұнады. Сөйтіп, бірге жаттығу туралы шешімге келдік. 

- Демек сіздер алдағы уақытта да бірге жұмыс істейсіздер ғой, иә?

- Иә. Қазақстандағы кәсіпқой боксты екеулеп дамытатын шығармыз. Басқа жігіттер бұл бағытта көп жұмыс істеп жатыр. Қанаттың ісіне байланысты және менің мәселелерім бойынша Америкада барайын деп жатырмыз. Жаңа жылға дейін емес шығар. Өйткені, үлгермейміз. 2018 жылы барып промоутерлермен келіссөз жасап, бірге жұмыс істейміз. 

Айта кетейік, қараша айының соңында Бүкіләлемдік бокс кеңесі (WBA) Қанат Ислам мен осы салмақта рейтингте екінші тұрған америкалық Джон Вера арасындағы кездесудің өтуін міндеттеген еді. Бұл кездесуде жеңіске жеткен боксшы чемпионнның міндетті қарсыласы болады. Екі боксшының командасында жекпе-жекті ұйымдастыруға 30 күн бар. Кері жағдайда кездесу бәссаудаға қойлады.

Қанат Ислам соңғы кездесуін 9 қыркүйек күні елордамыз Астана қаласында өткізіп, канадалық Брэндон Кукты (18-1, 11 КО) тоғызыншы раундта техникалық нокаутпен жеңді. Осылайша отандасымыз WBO NABO және WBA Inter-Continental белбеулерін сақтап қалды.

Ал Бейбіт Шүменов болса жарақатына байланысты карьерасын аяқтаған еді. Бірақ ол бүгін біздің порталға берген сұқбатында шаршы алаңға қайта оралуды ойластырып жүргенін айтып берді.