Андраде 2018 жылдың басында Головкинмен кездесуге дайын екенін айтты

Деметриус Андраде.Team Sauerland©

Бірінші орта салмақта WBA белбеуінің бұрынғы иегері америкалық Деметриус Андраде (25-0. 16 КО) келесі жылдың басында WBC, WBA (Super), IBF және IBO белбеуінің иегері қазақстандық Геннадий Головкинмен (27-0-1, 33 КО) кездесуге дайын екенін айтты.

Андраде орта салмаққа 2017 жылдың ортасында ауысқан еді. Бұл салмақтағы өзінің бірінші жекпе-жегінде ол отандасы Алантес Фокспен (23-1-1, 13 КО) кездесіп, жеңіске жетті.

"Желтоқсан айында шаршы алаңға шығу туралы әңгіме болған еді. Бірақ созылып кетті бұл әңгіме. Мен шаршы алаңға қайта оралғым келеді. Дегенмен биыл шықпайтын шығармын. Келесі жылдың ақпан немесе наурыз айында жекпе-жек өткізуді жоспарлап отырмын. Егер Головкинмен кездесу ұйымдастыру болса, мен салмағымды қалыпқа келтіре алатын едім. Мен карьерамды 160 фунтта жалғастыруды жөн санадым. Сондықтан да осы салмақтағы үздіктердің бірімен кездескім келеді", - дейді Андраде On The Ropes Boxing Radio басылымына берген сұқбатында.

Бұған дейін Головкиннің промоутері Том Леффлер егер алдағы күндері мексикалық Сауль "Канело" Альварестен (49-1-2, 34 КО) екінші кездесу туралы жауап болмаса, қазақстандық боксшының НВО арнасымен наурыз немесе сәуір айында жекпе-жек өткізу туралы келісімшарты бар екенін айтты.

Әлеуметтік желілерде бөлісу