Golden Boy Promotions пен "Канело" Головкинмен екінші кездесу туралы шешімді қашан жариялайтыны белгілі болды

Осы аптада мексикалық боксшы Сауль "Канело" Альварес (49-1-2, 34 КО) Golden Boy Promotions промоутерлік компаниясымен кездесіп, орта салмақта WBA (Super), IBO, WBC және IBF белбеуінің иегері Геннадий Головкин (37-0-1, 33 КО) өтетін екінші кездесу туралы келіссөздер жүргізетін болды.

Еске салайық, "Канелоның" келесі кездесуі 2018 жылдың 5 мамырына жоспарланып отыр. Бірақ қарсыластың кім болатыны әлі белгісіз.

"Ол енді ғана АҚШ-қа оралды. Осы аптаға біз "Канеломен" кездесуім керек. Кездесіп онымен ақылдасуымыз керек. Көп нәрсе шешіліп қойды. Бірақ әлі ақылдасатын дүниелер бар.

Далластағы стадион мен Нью-Йорктегі спорт кешені кездесуді қабылдауға сақадай сақ. Енді біз кездесу туралы келісімге қол қойсақ, жекпе-жектің өтетін орнын анықтауға кірісеміз. Бірінші кездесуді де біз осылай шештік.

Головкин мен "Канело" арасындағы екінші кездесуді ұйымдастыру - менің басты мақсатым. Бұған жұмысқа қазір Оскар Де Ла Хойяның өзі де кірісті. Жанкүйерлер асыға күтіп отырған кездесу үшін келісімге келгенімізді жуық арада ресми хабарлаймыз", - дейді Гомес FightHub басылымына берген сұқбатында.

Еске салайық, Головкин мен "Канело" арасындағы жекпе-жек 16 қыркүйек күні Лас-Вегаста өтіп, тең аяқталды. Осылайша қазақстандық боксшы өзіне тиесілі белбеулерін сақтап қалды. Олардың екінші кездесуі 2018 жылдың 5 мамырында өтуі мүмкін. Қазір бұл туралы екі боксшының командалары келіссөз жүргізіп жатыр.

Әлеуметтік желілерде бөлісу