Келл Брук Қанат Ислам өнер көрсететін салмаққа ауысты

Келл Брук. Сурет: Amanda Westcott / Showtime

Жартылай орта салмақта IBF белбеуінің бұрынғы иегері (36-2, 25 KO) салмағын өзгерту туралы шешімге келді

Бұл туралы боксшының промоутері Эдди Хирн Instagram парақшасында хабарлады. Енді келесі кездесуін Брук бірінші орта салмақта өткізеді.

Бұл салмақта қазіргі таңда әлем чемпионы атақтары пуэрторикалық Мигель Котто (WBO), америкалық Джермелл Чарло (WBC), Джарретт Херд (IBF) және кубалық Эрисланди Лараға (WBA) тиесілі.

Одан бөлек, бұл салмақта отндасымыз Қанат Ислам (25-0, 20 КО) да өнер көрсетеді.

Брук шаршы алаңға келесі жылдың бірінші жартысында оралуды жоспарлап отыр. Британдық боксшы соңғы екі кездесуінде жеңілген еді. 2016 жылдың қыркүйек айында Брук орта салмақтағы WBA (Super), WBC, IBF және IBO белбеулерінің иерегрі қазақстандық Геннадий Головкинмен кездескен. Ол жекпе-жек Лондон қаласында өтіп, GGG бесінші раундта техникалық нокаутпен жеңіске жетті. Осы кездесуде Брук көзін жарақаттап алған еді.

Ал өзінің соңғы кездесуін Брук америкалық Эррол Спенске (27 мамыр) қарсы өткізіп, 11 раундта нокаутпен жеңіліс тапты. Бұл кездесуде британдық боксшы тағы да көзін жарақаттап алды. Осы кездесуден кейін Брук біржолата бокстан кетемін дегенді айтты. Бірақ кейін ол командасымен ақылдасып, карьерасын жалғастыратын болды. Енді оның келесі кездесуі 2017 жылдың соңында өтуі мүмкін.

Айта кетейік, 33 жастағы Қанат Ислам қазіргі уақытта бірінші орта салмақтағы WBO NABO және WBA Inter-Continental белбеулерінің иегері. Ол соңғы кездесуін 9 қыркүйек күні Астанада өткізіп, канадалық Брэндон Куктан үстем түсті.

Әлеуметтік желілерде бөлісу