Мейірім Нұрсұлтанов Ковалев пен Шабранскийдің арасында өтетін бокс кешінде жеңіліп көрмеген америкалық боксшымен жұдырықтасады

Сурет боксшының әлеуметтік желісінен алынды

Қазақстандық кәсіпқой боксшы Мейірім Нұрсұлтанов (4-0, 3 КО) Сергей Ковалев (30-2-1, 26 КО) пен украиналық Вячеслав Шабраский (19-1, 16 КО) арасында өтетін жекпе-жек кешінде жеңіліп көрмеген америкалық боксшымен кездеседі, деп хабарлайды Vesti.kz порталы.

Бұл бокс кешінде 24 жастағы отандасымыздың қарсыласы Эрик Мун болады. 26 жастағы америкалық боксшы кәсіпқой бокс шаршы алаңында 7 кездесу өткізіп, барлығында жеңіске жеткен. 6 рет ол қарсыластарын нокаутқа түсірген.

Соңғы кездесуін Мун қыркүйек айында өткізіп, пуэрторикалық Маркус Брукстан айласын асырған. Жекпе-жек 6 раунда жоспарланып отыр.

Ал Мейірім Нұрсұлтанов болса кәсіпқой бокста төрт кездесу өткізіп, төртеуінде де жеңіске жетті. Үш кездесуінде отандасымыз қарсыласын нокаутқан түсірген.

Соңғы рет Нұрсұлтанов шаршы алаңға елордамыз Астана қаласында өткен бокс кешінде шығып, бірінші раундтың елуінші секундында бразилиялық қарсыласы Исмаэль Буэнодан үстем түсті.

Айта кетейік, 34 жастағы ресейлік боксшы Сергей Ковалев пен 30 жастағы украиналық Вячеслав Шабранский арасындағы кездесу 25 қараша күні Нью-Йорктағы Madison Square Garden спорт кешенінде өтеді. Боксшылар бұл кездесуде жартылай ауыр салмақтағы WBO белбеуін сарапқа салады.

Әлеуметтік желілерде бөлісу