Билли Джо Сондерстің келесі кездесуі қайда өтетіні белгілі болды

©Getty Images

Орта салмақта WBO белбеуінің иегері британдық боксшы Билли Джо Сондерстің (25-0, 12 КО) келесі кездесуі қашан және қайда өтетіні белгілі болды, деп хабарлайды Vesti.kz порталы.

Британдық боксшының промоутері Фрэнк Уорреннің айтуынша, Сондерс шаршы алаңға 9 желтоқсан күні қайта оралады. Оның жекпе-жегі Лондондағы Box Arena спорт кешенінде өтеді. Қарсыласы әлі анықталмаған.

Еске салайық, қыркүйек айының ортасында дәл осы спорт кешенінде Сондрес кіші Вилли Монроны жеңіп, чемпиондық белбеуін қорғап қалған еді.

Бұл жекпе-жектен кейін британдық боксшы орта салмақтағы WBA (Super), IBO, WBC және IBF белбеулерінің иегері қазақстандық Геннадий Головкинді (37-0-1, 33 КО) жекпе-жекке шақырды. GGG де қыркүйек айының ортасында Лас-Вегаста мексикалық Сауль "Канело" Альвареспен 12 раундық кездесу өткізіп, тең түскен еді.

Уорреннің айтуынша, Сондерс желтоқсан айында біздің отандасымызбен кездесуді мақсат еткен. Сондай-ақ ол Амир Ханмен кездескісі келетінін де айтты. Осы сөз үшін Сондерсті наурыз айында Головкиннен жеңілген Дэниел Джейкобс та сынап тастаған болатын.

Ал Головкиннің промоутері Том Леффлердің айтуынша, қазақстандық боксшы жылдың соңына дейін тағы бір кездесу өткізбейді екен. Егер олар "Канеломен" екінші кездесу өткізу туралы келісімге келсе, қазақстандық боксшы келер жылдың мамыр айына дейін демалыс алады екен.

Әлеуметтік желілерде бөлісу