Фируза Шарипова көктемде Таразда жекпе-жек өткізуді жоспарлап отыр

Жеңіл салмақта WIBA және WBU нұсқалары бойынша әлем чемпионы қазақстандық Фируза Шарипова алдағы екі жекпе-жегін өз елінде өткізуі мүмкін, - деп хабарлайды спортшы қыздың баспасөз қызметі.

"Бүгін біз Жамбыл облысының әкімі Кәрім Көкрекбаевпен кездестік. Милена Колеваны жеңіп, чемпиондық екі белбеуді иеленгені үшін ол Фирузаға Тараз қаласынан пәтер кілтін сыйлады, сонымен қатар біз алдағы жоспарымыз туралы сөйлестік. Келесі жылдың сәуір айының соңына дейін Фируза Шарипова Тараз қаласында жекпе-жек өткізетін болып келістік. Ал оған дейін қарашаның соңында желтоқсанның басында Фируза Алматыда не Мәскеуде екі жекпе-жек өткізеді. Бұл жекпе-жектерде Фируза іргелес салмақ дәрежелерінің чемпионы атағына таласады. Біз жақын уақытта үш салмақ дәрежесінде чемпион атағын жеңіп алуды жоспарлап отырмыз. Ол өз елінде өнер көрсеткеніне дән риза, ол өз жеңістерімен елінің, Тараздың атын бүкіл әлемге шығарғасы келеді. Жамбыл облысы әкімдігіне және Кәрім Көкрекбаевқа осындай қолдау білдіргені үшін алғыс білдіремін. Фирузаның жеңістеріне сөзбен де іспен де қолдап жатқан адамдар себепкер", - деді Шарипованың менеджері Сергей Завильский.

Еске салайық, 26 тамызда Астанада өткен бокс кешінде Фируза Шарипова Милена Колеваны жеңіп, чемпиондық екі белбеуді иеленді. Шарипова әйелдер арасында кәсіпқой бокста чемпион атанған Қазақстаннан шыққан жалғыз қыз.

Әлеуметтік желілерде бөлісу