Мейвезер - МакГрегор табысы Головкин - "Канело" кездесуінен билеттер сатылымы бойынша екі есе асып кетті

Америкалық Флойд Мейвезер мен ирландиялық Конор МакГрегор арасында өткен жекпе-жекте билеттер сатылымынан түскен қаражаттың мөлшері белгілі болды, - деп хабарлайды Vesti.kz.

ESPN және Bloodyelbow мәліметінше, табыс 55 миллион долларға жеткен. 27 тамызда Лас-Вегастың T-Mobile Arena аренасына өткен кездесуге 13 094 билет сатылған. Билет бағасының қымбат (ең арзаны 500 доллар, ең қымбаты - 10 000) болуына байланысты алты мың билет сатылмай қалды.

Бұл UFC президенті Дана Уайт айтқан 70 миллионнан әлдеқайда аз, ал Мейвезер 80 миллион доллар түсті деп жар салған болатын. Алайда бұл әлем бойынша екінші көрсеткіш.

2015 жылы Мейвезер филиппиндік Мэнни Пакьяомен кездескенде 72 миллион доллар түскен болатын.

Салыстыратын болсақ, қазақстандық Геннадий Головкин мен Сауль "Канело" Альварес арасында 16 қыркүйекте өтетін жекпе-жектен түсетін қаражат - 30 миллион доллар. Промоутерлердің айтуынша, билеттер түгелдей сатылып кеткен. Бокс кешінде аншлаг болуы керек.

Айта кетейік, Мейвезер мен МакГрегор бокс ережесі бойынша жұдырықтасып, америкалық жеңіске жеткен еді. Флойд 50 кездесуде 50-ші рет жеңіске жетті. МакГрегор кәсіпқой бокста бірінші рет өнер көрсетті.

Әлеуметтік желілерде бөлісу