Қанат Ислам менің карьерамдағы ең мықты қарсылас - Брэндон Кук

Бірінші орта салмақта өнер көрсететін канадалық боксшы Брэндон Кук Vesti.kz порталының тілшісіне Қанат Исламнан қандай қауіп күтетінін айтып берді.

- Қанат Ислам мықты боксшы екенін білемін. Ол чемпион. Сондықтан да мен қиын жағдайда тұрмын. Мен оның тек екі ғана жекпе-жегін көрдім. Сол үшін оның жұдырықтасу стильі туралы ештеме айта алмаймын. Негізі кездесу алдында қарсыласымның жекпе-жегін көргім келмейді. Қарсыласты зерттеуді бапкеріме қалдырамын.

Мен үшін қуанатын жәйт, бір ай бұрын мен жұмысымнан шығып кеттім. Енді Қанат Исламға қарсы кездесуге алаңсыз жаттығатын боламын. Бұған дейін мен 10 жыл бокспен есік-терезе орнатуды қатар алып жүрдім.

- Қанат Исламды сіз үшін қауіпті қарсыласы деп ойлайсыз ба?

- Әрине! Ол менің карьерамдағы ең мықты әрі қатал қарсыластарымның бірі. Бірақ мен оған тойтарыс беруге дайын боламын.

- Сіз бірінші рет Канададан тыс жерде жұдырықтасасыз. Бұл сіз үшін қиындық туғызбайды ма?

- Жекпе-жектің қай жерде өтетіні маған қызық емес. Себебі, мен ешкімнен қорықпаймын. Сондықтан да бұл жекпе-жек үшін жарты әлемді басып өтіп, Қазақстанға баруға дайынмын. Менің арманым - чемпиондық белбеуге таласу.

Еске салайық, Қанат Ислам және Брэндон Кук арасындағы жекпе-жек 9 қыркүйекте Астанада өтеді.

Әлеуметтік желілерде бөлісу