Қазақстандық нокаутшы Әли Ахмедовтің АҚШ-тағы алғашқы қарсыласы анықталды

Жартылай ауыр салмақта жұдырықтасатын қазақстандық Әли Ахмедовтің (6-0, 4 КО) АҚШ-та қолғап түйістіретін алғашқы қарсыласы анықталды, - деп хабарлайды Vesti.kz.

21 жастағы Ахмедов рингке 22 шілдеде шығатын болды. Boxrec.com сайтының мәліметінше, ол 40 жастағы америкалық Брэд Остинмен (Brad Austin) кездесу өткізеді. Америкалық 36 жекпе-жегінде 12 рет жеңіске жеткен (9 КО) және 24 рет жеңіліске ұшыраған, оның тоғызы уақытынан бұрын аяқталған. 

Жекпе-жек Шарлотт қаласындағы (Солтүстік Каролина штаты) бокс кешінің аясында өтеді деп жоспарланған. Ахмедов АҚШ-та тұңғыш рет жұдырықтасады.

Ал бастапқыда Ахмедовтің жекпе-жегі 30 шілдеде Миннеаполисте өтетіні және бәске Бүкіәлемдік бокс кеңесінің  (WBC) белбеулерінің бірі NABF тігіледі делінген еді. Алайда әзірше бізге белгісіз бір өзгерістер болғанға ұқсайды.