Санчес Головкин-Сондерс кездесуінің келіссөздері мен жекпе-жектің қаншалықты маңызды екенін айтып берді

WBA (Super), IBO, WBC және IBF тұжырымдары бойынша әлем чемпионы, қазақстандық боксшы Геннадий Головкиннің (37-0, 33 КО) бапкері Абель Санчес орта салмақтағы WBO тұжырымының иегері британдық Билли Джо Сондерстің (24-0, 12 КО) командасымен келіссөздер қалай жүріп жатқанын айтып берді.

"Мен Головкин мен Сондрес арасындағы жекпе-жекті көргім келеді. Өйткені, Головкиннің мақсаты - орта салмақтағы төрт белбеуді иелену. Егер ол барлық белбеуді біріктіретін болса, біз басқа бағыт бойынша жұмыс істейтін боламыз. Сондықтан да бұл жекпе-жек Головкин үшін маңызды.

Том Леффлер (Головкиннің промоутері) мен Фрэнк Уоррен (Сондерстің промоутері) әлеуметтік желісіндегі жазбаларына қарайтын болсақ, олар бір шешімге келуге жақын қалыпты. Менің ойымша, олар Сондерске біз ұсынып отырған сыйақы бойынша келісімшарт жасау туралы мәселені шешіп жатыр", - дейді Санчес On The Ropes Boxing Radio басылымына берген сұхбатында.

Айта кетейік, дереккөздің мәліметі бойынша, Головкин мен Сондерстің жекпе-жегі 10 тамыз күні Қазақстанда өтеді. Сонымен қатар, британдық боксшы өзінің твиттер парақшасында бұл кездесудің 24 тамыз күні Лондондағы O2 Arena спорт кешенінде өтетінін хабарлады.

Әлеуметтік желілерде бөлісу