Головкинге еркінсуге болмайды, себебі Джейкобс жекпе-жекті уақытынан бұрын аяқтауға қауқарлы - ESPN тілшісі

Головкин мен Джейкобс. Сурет boxingscene.com

Оңтүстікамерикалық ESPN басылымының тілшісі Фернандо Барбоза Vesti.kz сайтына берген сұхбатында орта салмақта WBA (Super), IBO, WBC және IBF тұжырымдары бойынша әлем чемпионы қазақстандық боксшы Геннадий Головкин (36-0, 33 КО) мен америкалық боксшы Дэниэл Джейкобстың арасындағы жекпе-жек туралы ойымен бөлісті.

"Дэниэл Джейкобс - қарымды қарсылас. Рингте Головкинге еркінсуге болмайды, себебі Джейкобс секілді панчер жекпе-жекті уақытынан бұрын аяқтауға қауқарлы. GGG-дің бұл кездесуде фаворит екені даусыз, алайда Джейкобстың да айтары бар. Жекпе-жек сарапшылар мен жанкүйерлер күткендей дәрежеде өтсе екен деген тілегім бар. Өз басым, қос спортшыдан да әдемі бокс күтемін", - дейді Барбоза

Еске сала кетейік, Головкин - Джейкобс жекпе-жегі 18 наурызда Нью-Йоркте өтеді. HBO арнасы бұл жекпе-жекті ақылы трансляциялар жүйесі (PPV) арқылы көрсетеді. Қазақстанда жекпе-жекті "Қазақстан" және KazSport арналары көрсетеді. Отандасымыздың бұл жекпе-жегін "Қазақстан" ҰТА мен "Kazsport" телеарнасы тікелей эфирде көрсетеді. Трансляцияның басталуы 19 наурызда 08:00-де.

Әлеуметтік желілерде бөлісу