"Қарсыластарды ақылға салып таңдаған жөн". Стойлов Әзірбайжанға қарсы өтетін кездесу туралы ойымен бөлісті

Футболдан Қазақстан Ұлттық құрамасының бас бапкері Станимир Стойлов маусым айында Әзірбайжан құрамасымен өтетін кездесу туралы өз пікірін білдірді.

- Қазақстан футбол федерациясы маусым айында елордада Әзірбайжан құрамасымен жолдастық матч өткізетінін жариялады. Әзірбайжан құрамасы не себептен таңдалды? Қарсылас туралы айтып өтсеңіз?

- Ең алдымен Қазақстанға келу үшін келісім берген Әзірбайжанға алғысымды айтқым келеді. Екіншіден, келіссөзді жүргізген Қазақстан футбол федерациясы үлкен жұмыс атқарды деп санаймын. УЕФА-ның Ұлттар лигасының алғашқы ойыны үйде өтетін болғандықтан, жолдастық кездесуді өз алаңымызда қабылдауға шешім қабылдадық. Іріктеу тобындағы қарсыласымыз Грузиямен ойыны ұқсас болғандықтан Әзірбайжанды таңдадық.  Соңғы жылдары Әзірбайжан құрамасы жақсы ойын көрсетіп жүр. Команданы жаттықтыратын Гурбан Гурбановтың да білікті бапкер екенін атап өткім келеді. Әзірбайжанның клубтық деңгейдегі футбол көтеріліп келе жатқанын білеміз. Біздің команданың дайындығын тексеруге жақсы мүмкіндік болмақ.

- Маусым айындағы қарсылас белгілі. Ұлттық құраманың оқу-жаттығу жиынындағы жоспарымен бөлісе отырсаңыз?

- 1-5 маусым аралығында Астана қаласында оқу-жаттығу жиынын өткіземіз. Біздің міндетіміз команданың ойын үлгісін қалыптастыру. Венгрия және Болгариямен өткен матчтардағы ойын үлгісін әрі қарай дамыта түсу мақсатын алға қоямыз. Алғашқы оқу-жаттығу жиынын жақсы өткіздік. Әр жиын сайын командаға жаңа леп қосып отыру қажет. Әрине, әзірге үлкен қадамдар жасай алмаймыз. Бірте-бірте алға жылжып отыру керек.  10 маусым күніне жолдастық кездесу белгілемедік. Өйткені, маусым-шілде айларында футболшыларға түсетін ауыртпашылықты білеміз. Футболшылар ішкі біріншілік пен еурокубок турнирлерінде ойнайды. Ұлттық құрама ойыншыларына 4-5 күн демалуға рұқсат беремін. Өйткені, 2-2,5 ай бойы оларға түсетін салмақ көп болмақ. Еурокубокта ойнайтын командалардың жақсы нәтиже көрсетуі біз үшін де маңызды. Топтық кезеңге бірнеше команда жолдама алса, ол біз үшін үлкен жетістік болмақ.

- Премьер-лиганың бес туры аяқталды. Соңғы турда "Астана" мен "Қайрат" жолықты. Ұлттық құрама футболшыларының ойыны қалай? Маусымдағы жиынға шақырту алуға үмітті жаңа есімдер бар ма?

- Ұлттық құраманың матчтарынан кейін командалар деңгейлерін көтеріп, бабына келе бастады. "Астана" мен «Қайрат» арасындағы кездесу өте тартысты өтті. Ұлттық құраманың ойыншылары осы матчта жақсы ойын көрсетті. Маусым айына дейін бірнеше ойынды қарап, ортақ тұжырымға келеміз. Жаңа есімдер шығып жатса, Ұлттық құрамаға шақырту алады.