Футболдан Қазақстан құрамасының жаңа бас бапкері қашан белгілі болады?

Сурет ҚФФ ресми сайтынан алынды.

Қазақстан футбол федерациясының (ҚФФ) баспасөз қызметі Vesti.kz порталының тілшісіне құраманың жаңа бас бапкері қашан тағайындалатынын туралы айтып берді.

"Қазіргі уақытта ұлттық құраманың бас бапкерлігіне үміткер мамандармен келіссөз жүріп жатыр. Үміткерлердің де саны азайып қалды. Жаңа бас бапкердің алдына УЕФА-ның жаңа турнирі - Ұлттар лигасында жақсы өнер көрсету деген тапсырма қойылады. Жуық арада Қазақстан футбол федерациясының ресми сайтында жаңа бас бапкердің есімін жариялайды. Бапкер қызметіндегі алғашқы кездесулер 23 және 26 наурыз күндері Венгрияда өтетін жолдастық кездесулерде өткізеді", - дейді ҚФФ баспасөз қызметі.

Еске салайық, қаңтар айында Қазақстан құрамасының бас бапкерлігі қызметінен Александр Бородюк кеткен болатын. Ресейлік маман құрамамыздың тізгінін 2017 жылдың 27-ақпанында ұстады. Келісімшарт үш жылға жасалған. Бірақ әлем чемпионатының іріктеу турниріндегі нашар көрсеткішке байланысты маман отставкаға жіберілді. Оған дейін Бородюк алматылық "Қайраттың" бас бапкері қызметін атқарды.

Айта кетейік, 23 наурыз күні Қазақстан құрамасы Будапештте Венгрия құрамасымен, ал 26-наурыз күні Фельчут қаласында Болгария құрамасымен жолдастық кездесу өткізеді.

Әлеуметтік желілерде бөлісу