Аргентина құрамасы әлем чемпионатының алдында Қазақстанмен жолдастық кездесу өткізуі мүмкін

Reuters©

Аргентина құрамасы Ресей жерінде өтетін футболдан әлем чемпионатының алдында Қазақстан құрамасымен жолдастық кездесу өткізуі мүмкін. Бұл туралы AS Argentina хабарлап отыр.

Ойын 4-маусым күні Астанада өтуі ықтимал. Бұл күні 32 елдің бас бапкерлері әлем чемпионатына қатысатын құрама ойыншыларының соңғы тізімін өткізулері керек. Сондықтан да бұл ойынға Аргентина құрамасының бас бапкері Хорхе Сампаоли әлем чемпионатына қатысатын 23 футболшына ма немесе қосалқы құрам ойыншылары алып келеді ме, белгісіз болып тұр.

Орайы түскенде айта кетейік, мамыр айынан бастап ФИФА құраманың кеңейтілген тізіміне 35 футболшыға дейін шақыртуға рұқсат етейін деп жатыр.

2018 жылғы әлем чемпионаты 14 маусым мен 15 шілде аралығында өтеді. ФИФА ережесі бойынша мұндай ірі турнирдің алдында клубтар ойыншыларын құрамаға 15 күн алдын жіберуі керек.

Аргентина құрамасы наурыз айында екі жолдастық кездесу өткізеді. Алдымен Италия, содан соң Испания құрамаларымен. Сондай-ақ әлем чемпионатының алдында да бұл құрама бірнеше жолдастық кездесу өткізеді. Алайда ол кездегі қарсыластар әлі белгісіз болып тұр.

Әлем чемпионатында Аргентина құрамасы D тобында өнер көрсетеді. Бұл топта Хорватия, Исландия және Нигерия құрамалары бар. Аргентина құрамасының топтық кезеңіндегі ойындары 16, 22 және 27 маусым күндері өтеді.

Еске салайық, 2017 жылдың 23 қарашасында Vesti.kz порталының тілшісіне Қазақстан футбол федерациясының спорттық директоры Игорь Утробин Қазақстан құрамасы Аргентинамен жолдастық кездесу өткізу үшін келіссөз жүргізіліп жатқанын айтып еді. Оның айтуынша, ҚФФ бұл ойынға кететін шығынның 40 пайызын көтеруге дайын болған. Ал қалғанын көтеру үшін демеушілер іздестіріп жатқанын хабарлады. Бірақ кейін Аргентина Нигерия құрамасымен жолдастық кездесу өткізді.

һ

Әлеуметтік желілерде бөлісу