Мысыр құрамасы әлем чемпионатынан шығып қалған соң бас бапкерін қызметінен босатты

Эктор Купер. Сурет: Reuters

Мысыр футбол федерациясы Ресейде өтіп жатқан әлем біріншілігінен шығып қалғаннан кейін құраманың бас бапкері Эктор Куперді қызметінен босату туралы шешім қабылдапты. Бұл туралы BBC хабарлап отыр.

Федерация 62 жастағы маман мен оның көмекшілерін ұлттық құрамада атқарған қызметі үшін алғыс білдірді.

26 маусым күні мысырлық шенеуніктер құраманың сәтсіз өнер көрсетуін Чеченстан жерінде тоқтағанына байланысты екенін айтты. Олардың айтуынша, әлем біріншілігі кезінде футболшылар тәртіп сақтамаған.

Ресей жерінде өтіп жатқан әлем біріншілігінде Мысыр құрамасы бірде-бір ұпай ала алмады. Алдымен олар Уругвай құрамасынан (0:1) есебімен жеңілсе, кейін Ресей құрамасынан (1:3) жеңілді. Ал соңғы турда Сауд Арабиясы құрамасына (1:2) есе жіберді.

20 маусым күні, Мысыр құрамасы Ресейден жеңлгеннен соң елде Купердің жұмысына көңілі толмайтын адамдар бар екені айтылды. Сол кезде бапкердің қызметінен кететіні айтылды.

Купер Мысыр құрамасының тізгінін 2015 жылы ұстаған еді. Бұл маманның бастамасымен Мысыр құрамасы 2017 жылы Африка кубогінің финалына және 28 жылдан кейін әлем біріншілігінің финалдық кезеңіне шықты.

Әлеуметтік желілерде бөлісу