Бастиан Швайнштайгер мен бұрынғы теннисші Ана Иванович ұлды болды

©: lesoir.be

Футболдан Германия құрамасының бұрынғы футболшысы Бастиан Швайнштайгер мен бұрынғы теннисші Ана Иванович ұлды болды.

Қуанышты жаңалықты Сербияның Blic сайты хабарлады. БАҚ мәліметіне сәйкес, спортшылар тұңғышының есімін Лука деп қойған. Осыдан соң Ивановичтің өзі де ақпаратты растап әлеуметтік желіде жанкүйерлерінен сүйінші сұрады.

"Жарық дүниеге қош келдің, біздің кішкентай ғана ұлымыз! Бақыт пен қуанышымды жеткізетін сөз таба алмай отырмын!" – деп жазды Иванович өзінің твиттер парақшасында.

Швайнштайгер мен Иванович 2016 жылы Италияда үйлену тойын өткізген болатын. Бұл жұп негізі 2014 жылдан бері кездесіп келген.

30 жастағы Иванович карьерасын 2016 жылы аяқтады. Әлемнің бұрынғы бірінші ракеткасы 13 жылда WTA санатындағы 15 турнирде және 2008 жылы "Ролан Гаррос" додасында топ жарған.

33 жастағы Швайнштайгер болса қазір америкалық "Чикаго Файр" клубының сапында өнер көрсетеді. Бұған дейін ол "Манчестер Юнайтед" пен "Бавария" клубтарының намысын қорғаған.

Әлеуметтік желілерде бөлісу