"Реал" клубтар арасындағы әлем чемпионатының финалына шықты

©: eurosport

Мадридтік "Реал" тартысты кездесуде БАӘ-нің "Аль-Джазира" клубын жеңіп, клубтар арасындағы әлем чемпионатының финалына шықты.

Абу-Дабиде өткен жартылай финалдық кездесу 2:1 есебімен "Реалдың" пайдасына аяқталды. Негізі есепті алаң қожайындары ашқан еді. Кездесудің 41-минутында Ромариньо көзге түсті. Зинедин Зидан командасының сапында 53-минутта Криштиану Роналду мен 81-минутта Гарет Бэйл гол соқты.

Ойынның 47-минутында "Аль-Джазира" клубының жартылай қорғаушысы Мбарк Буссуфа алаң қожайындарының екінші голын соққан еді. Бірақ кездесудің бас төрешісі Сандро Риччи бейнеқайталауды көргеннен кейін, голды есепке алмады.

Бұл ойын барысында Роналду клубтар арасындағы әлем біріншілігінің үздік сүрмергені атанды. Оның еншісінде енді алты гол бар.

16 желтоқсан күні өтетін финалдық кездесуде "Реал" бразилиялық "Гремио" клубымен кездеседі. Дәл осы күні "Аль-Джазира" мен мексикалық "Пачука" клубтары үшінші орынды сарапқа салады.

Әлеуметтік желілерде бөлісу