Футболдан Мысыр құрамасы 28 жылдан кейін әлем чемпионатына қатысады

Футболдан Мысыр құрамасы 28 жылдан кейін әлем чемпионатына қатысады Футболдан 2018 жылы Ресейде өтетін әлем чемпионатына қатысатын 15 елдің құрамасы анықталып үлгерді.

Олардың қатарында Мысыр құрамасы 28 жылдан кейін барып қана әлем чемпионатына қатыспақ. Конго құрамасын 2:1 есебімен ұтқан мысырлық футболшылар өз топтарында бірінші орын алды.

Бұл құрама соңғы рет 1990 жылы Италияда өткен әлем чемпионатына қатысқан. Әлем чемпионатына Ресей құрамасы жарысты ұйымдастырушы ел ретінде қатысады. Яғни, ресейлік футболшылар іріктеу кезеңіне қатысқан жоқ.

Еуропа құрылығынан әлем біріншілігінің финалдық кезеңіне Ресейден бөлек, Бельгия (Н тобында бірінші орын), Германия (С тобында бірінші орын), Англия (F тобында бірінші орын), Испания құрамасы (G тобында бірінші орын) және Польша (Е тобында бірінші орын) құрамалары шықты. Сонымен қатар келер жылғы әлем чемпионатына Иран (Азия іріктеу кезеңінде А тобында бірінші орын), Жапония (Азия іріктеу кезеңінде В тобында бірінші орын), Мексика (Солтүстік Америка құрылығының іріктеу кезеңінде бірінші орын), Бразилия (КОНМЕБОЛ іріктеуінде бірінші орын), Оңтүстік Корея (Азия іріктеу кезеңінде А тобында екінші орын), Сауд Арабиясы (Азия іріктеу кезеңінде А тобында екінші орын), Мысыр (Африка іріктеу кезеңінде Е тобында бірінші орын), Коста-Рика (Солтүстік Америка құрамасындағы іріктеуде екінші орын), Нигерия (Африка құрылығында В тобында бірінші орын) құрамалары жолдама алып отыр.

Еске салайық, Ресейдегі әлем чемпионаты келер жылдың 14 маусымы мен 15 шілдесі аралығында өтеді. Финалдық кезеңде 32 құрама бақ сынайды.

Әлеуметтік желілерде бөлісу