"Барселона" Филиппе Коутиньо мен Анхель ди Марияны сатып алудан үмітін үзер емес

Каталондық «Барселона» «Ливерпульдің» жартылай қорғаушысы Филиппе Коутиньо мен «Пари Сен-Жерменнің» ойыншысы Анхель ди Марияны сатып алу жөнінде тағы да ұсыныс жасайды.

Mundo Deportivo басылымының мәліметі бойынша, мерсисайдтық клуб Филиппе Коутиньоны кем дегенде 140 миллион еуро және қосымша 20 миллион еуро сыйақы ұсынған жағдайда ғана сататынын мәлімдеген. Ал «ПСЖ» Анхель ди Марияны сатудан үзілді кесілді бас тартып отыр. Дегенменде футболшының жеке агенті париждік клубтың басшылығын көндіріп көрмек.

25 жастағы Филиппе Коутиньо «Барселонамен» 5 жылдық келісімге келіп қойған. Тек «Ливерпуль» клубының келісімін күтіп отыр. Коутиньо «Ливерпуль» сапына 2013 жылы италиялық «Интер» сапынан ауысып келген еді. Осы уақытқа дейін ол ағылшындық клуб сапында 136 ойынға қатысып, 31 гол соққан. Ал Анхель ди Мария «ПСЖ-ға» 2015 жылы «Манчестер Юнайтедтен» ауысып келген. Париждік командада 56 матчта алаңға шығып, 16 мәрте қарсыласының қақпасын дәл көздеген.

Айта кетсек, күні кеше «Барселона» дортмундтық «Боруссияның» жартылай қорғаушысы Усман Дембелені 105 миллион евроға сатып алған болатын.

Әлеуметтік желілерде бөлісу