Криштиану Роналду 12 ойыннан шеттетілуі мүмкін

Мадридтік "Реалдың" шабуылшысы Криштиану Роналду Барселонаға қарсы өткен Испания суперкубогында төрешіні итеріп жібергені үшін ұзақ мерзімді жаза алуы мүмкін. Бұл туралы Goal.com хабарлайды.

Кездесудің бас төрешісі Рикардо Бенгоэчеа Роналдудың алаңнан кетіп бара жатып, төрешіні итеріп жібергенін ойынның ресми хаттамасына қосып қойыпты. "Алаңнан қуылғаннан соң шабуылшы төрешінің шешімімен келіспей, бас қазына итеріп жіберді", - делінген хаттамада.

Испания футбол федерациясының ережесі бойынша, мұндай қылығы үшін футболшы төрт ойыннан 12 ойынға дейін шеттетілуі мүмкін.

Егер Роналдуды федерация бес матчтан көп ойынға жазалайтын болса, онда бұл жаза ішкі біріншілікке де әсерін тигізеді. Ал төрт ойынға шеттетілсе, бұл жазаның күші тек суперкубок ойындарына ғана қолданылады.

Еске салайық, Криштиану Роналду "Барселона" - "Реал" кездесуінің 80-минутында алаңға шығып, арада алты минут өткеннен кейін екінші сары қағаз алып, алаңнан қуылды. Бірақ "Реал" төрешінің бұл шешіміне шағымданамыз деп отыр.

Ал "Ноу Камп" стадионында өткен ойын 1:3 есебімен мадридтік команданың пайдасына аяқталды.

Әлеуметтік желілерде бөлісу