Неймар бүгін "Барселона" командасындағы әріптестерімен қоштасты

«Барселона» клубының шабуылшысы Неймар бүгін таңғы жаттығу алдында әріптестерімен қоштасты.

Каталондық клубтың Твиттердегі ресми парақшасының ақпаратына сәйкес бразилиялық футболшы бас бапкер Эрнесто Вальверденің рұқсатымен таңғы жаттығуға қатыспаған. Шетелдік БАҚ өкілдерінің хабарлауынша, Неймар әріптестерімен қоштасып, жаңа командаға ауысатынын айту үшін жаттығуға келіп кеткен. Бразилиялық шабуылшы командасымен жарты сағаттан астам уақыт бірге болып, артынша өз көлігімен кетіп қалған.

Неймар алдағы демалыс күндері Парижге келіп қажетті медициналық тексерістерден өтеді. Ал дүйсенбі күні «ПСЖ» клубымен ресми түрде келісімшартқа қол қояды.

25 жастағы бразилиялық футболшы «ПСЖ» клубына ауысатын болса, онда француздық клубтың бас демеушісі Qatar Sports Investments компаниясымен келісімшарт жасайтынын хабарлады. Бұл келісімшарт бойынша бразилиялық футболшы Катардағы әлем чемпионатының ресми өкілі атанып, алдағы бес жылдың ішінде 300 миллион евро көлемінде пайда табады.

Еске салайық, өткен аптада сол Marca басылымы «ПСЖ» клубына Неймарды «Барселонадан» 222 миллион евроға сатып алатыны туралы жазды. Сондай-ақ бұл келісімшарт бойынша Неймардың әкесі әрі оның агенті 40 миллион евро көлемінде сыйақы алатыны айтылды. Ал шабуылшының бір жылдық жалақысы 30 миллион евро болады.

Айта кетейік, Неймар «Барселона» сапына 2013 жылы бразилиялық «Сантос» сапынан ауысып келді. Осы уақытқа дейін ол каталониялық клуб сапында 123 кездесуге қатысып, 68 гол соқты. Сонымен қатар ол «Барселонамен» бірге екі рет Испания біріншілігін, үш рет Испания кубогын, Чемпиондар лигасын, УЕФА суперкубогын, Испания суперкубогын және клубтар арасындағы әлем чемпионатын жеңіп алды.

Әлеуметтік желілерде бөлісу