"Астана" Чемпиондар лигасынан қанша пайда тапты?

©Reuters

"Астана" клубы 2017/18 жылғы маусымдағы Чемпиондар лигасындағы жорығын аяқтады, деп жазады Vesti.kz порталы.

Елордалық клуб Чемпиондар лигасының топтық кезеңіне бір қадам жетпей қалды. Биылғы маусымның екінші іріктеу кезеңінде "Астана" юрмалалық "Спартак" (1:0, 1:1) клубынан, үшінші іріктеу кезеңінде польшалық "Легия" (3:1, 0:1) клубынан үстем түсіп, бірақ плей-офф кезеңінде шотландиялық "Селтик" (0:5, 4:3) клубынан өте алмады.

Чемпиондар лигасының екінші іріктеу кезеңінде жеңіске жеткені үшін "Астана" 320 мың еуро алды. Алайда үшінші және плей-офф кезеңіне шыққан командаларға сыйақы қарастырылмаған. Қазақстан чемпионы ретінде өнер көрсетіп, бірақ Чемпиондар лигасының топтық кезеңіне шыға алмағаны үшін біздің ұжым 230 мың еуро алады. Сонымен қатар Еуропа лигасының топтық кезеңіне шыққаны үшін елордалық клубтың есебіне 2,6 миллион еуро аударылады.

Осылайша, биылғы маусымда "Астана" клубы Чемпиондар лигасында жалпы 3 миллион 180 мың еуро көлемінде пайда тауыпты. УЕФА бұл сыйақыны маусым аяқталғаннан кейін, яғни келер жылдың маусым айында төлейді. Клубтар сонымен қатар маркетингтік құқықтан да сыйақы алатынын айта кетейік.

Енді біздің клуб Еуропа лигасында ойнайды. Бұл додада өнер көрсететін клубтарға да қомақты сыйақы қарастырылған. Тарқатып айтсақ, Еуропа лигасының топтық кезеңінде жеңіске жеткен команда 360 мың еуро, тең түскен команда 120 мың еуро көлемінде қосымша ақша алады. Еуропа лигасындағы "Астананың" қарсыластары 25 тамыз күні Монакодағы жеребе тарту рәсімінен кейін белгілі болады.

Еуропа лигасының топтық кезеңінде 48 команда өнер көрсетеді. Олар төрт-төрттен 12 топқа бөлінеді. Топтық кезеңнің бірінші ойындары 14 қыркүйек күні басталса, 7 желтоқсан күні мәресіне жетеді. Әр топта үздік шыққан екі команда плей-офф кезеңіне жолдама алады.

Әлеуметтік желілерде бөлісу