"Қайрат" командасы жаңа маусым алдында жанкүйерлерімен жүздесті

Алматының "Қайрат" футбол клубы жаңа маусым алдында жанкүйерлерімен жүздесіп, ойыншыларын таныстырды. Салтанатты шараға команданың ардагер ойыншылары да келіп, ақ батасын берді. БАҚ өкілдеріне арналған баспасөз жиыны өтіп, бас жаттықтырушы мен ойыншылар тілшілер сұрақтарына жауап берді.

Көктемнің алғашқы күніндегі мерекелік шара қарсаңында команда атынан ардагер ойыншылар мен демеушілерге біржылдық абонемент табысталды.



Келген жанкүйерлер футболшылармен суретке түсіп, естелікке қолтаңба алды. Команда жайлы деректі фильм көрсетілді.



Команданың алдағы маусымда киетін спорттық киім үлгілері де таныстырылды.



- Жаңа маусым жоғары деңгейде өтеді деп ойлаймын. Жарқын жеңіске жететінімізге уәде бермесем де, кәсіби тұрғыда бар күшімізді сала алатынымызға сенемін. Біз – бір отбасымыз. Шынын айтсақ, алдағы маусымға екі мақсат қойып отырмыз. Оның біріншісі – ел чемпионаты. Қазір бізде чемпион атануға зор мүмкіндік бар. Екінші мақсатымыз – Еуропа лигасының топтық кезеңіне шығу. Осы мақсатымызға жетуге күш саламыз, - деді команданың бас жаттықтырушысы Карлос Феррер.



- Маусым алдындағы дайындықты жақсы өткіздік, жақсы дайындалдық. Жоғары нәтиже көрсетуге дайынбыз. Жанкүйерлерді жеңісімізбен әр қуантуға тырысамыз, - деді команда капитаны Бауыржан Исламхан.



Алматылық клуб сапын осы қыста толықтырған футболшылардың бірі – Гай Ассулин. Кезінде "Барселона", "Манчестер Сити" секілді командалардың назарына іліккен ойыншы мансабын Қайратта жалғастырады.



- "Қайрат" секілді үлкен командаға келгеніме қуаныштымын. Келгеніме көп болмаса да, өзі үйімдей сезініп үлгердім. Жетістікке жету үшін бар күшімді саламын, - деді жартылай қорғаушы.



Команда ойыншылары жанкүйерлерінің алдында ашық жаттығу өткізіп, шеберліктерін көрсетті. Бас жаттықтырушы Карлос Феррер алдағы маусымның сәтті боларын айтып, жиналған жанкүйерлерге алғысын білдірді.