Кляйнхайслер не үшін Бундеслиганы Қазақстан біріншілігіне ауыстырғанын түсіндіріп берді

Венгрия құрамасының жартылайқорғаушысы Ласло Кляйнхайслер алдағы жылы "Астана" командасында жалда ойнайтын болады.
23 жастағы ойыншы елордалық команда сапында 6-шы нөмірмен өнер көрсетеді. Қазақстаннның үш дүркін чемпиондарымен еңбек келісімшартына қол қойған Кляйнхайслер клубымыздың баспасөз қызметіне өз пікірімен бөлісті:

- "Астана" футбол клубының өкілдері менің агентіме арнайы ұсыныс жасаған болатын. Мен көп ойланбастан келістім. Себебі, "Астана" - еурододалардың топтық кезеңінде өнер көрсетіп жүрген мықты клубтардың бірі, - дейді ол.

- Қазақстан туралы, Астана жайлы осыған дейін білдіңіз бе?

- Менің Қазақстан футболы туралы білетін ақпаратым аз болғанмен, еурододалардың топтық кезеңінде ойнаған "Астана" футбол клубы туралы естіген болатынмын. Мен ғаламтор арқылы барлық ақпаратты қарап шықтым. Астана қаласы маған ұнады, өте әдемі.

- "Қайрат" командасы сапында ойнайтын Ұлттық құрамадағы әріптесің Акош Элекпен елордалық командаға ауысар алдында ақылдасып көрдің бе?

- Біз келісімшартқа қол қоймай тұрып, бұл ақпаратты ешкімге айтпауға клуб өкілдерімен алдын ала келіскен болатынбыз. Енді, міндетті түрде Элекке хабарласып, сөйлесетін боламын.

- "Астана" командасы сапында өзіңізге қандай мақсат қоясыз?

-Мен "Астана" командасымен бірге Қазақстан чемпионатында топ жарып, Чемпиондар Лигасының топтық кезеңінде ойнағым келеді. Ол үшін қолымнан келгеннің барлығын жасаймын.

Әлеуметтік желілерде бөлісу