"Тобылға" қарсы ойынға ерекше ынтаммен шықтым - Рафкат Аслан

"Ақтөбе" ФК ресми сайтынан

"Ақтөбе" командасының қорғаушысы Рафкат Аслан Қазақстан біріншілігінің 2-ші туры аясында қостанайлық "Тобылға" қарсы өткен ойын (0:0) жайлы клубтың баспасөз қызметіне өз пікірін білдірді.

- Психологиялық жағынан да, физикалық жағынан да бүгінгі ойын біз үшін оңайға соққан жоқ. Бірінші турда жеңілген соң, командаға жаңа серпіліс керек болды. Біз бұл ойынға тек жеңу үшін шықтық. Екінші жағынан, "Тобыл" менің үш жыл бойы доп тепкен командам, яғни, бүгін өзімнің бұрынғы командама қарсы ойнадым. Сондықтан да мен бүгінгі ойынға ерекше ынтаммен шықтым. Есеп теңбе-тең, бірақ қалай да бүгін үш ұпай олжалауымыз керек еді. Сондықтан бұл есепке көңіліміз аса тола қоймады.

- "Тобыл" жанкүйерлері тарапынан саған ерекше "ыстық ықылас" болды ма? Яғни, ысқырып, қысым көрсететіндей, арандататындай әрекеттерді байқамадың ба?

- Жоқ, ондай әрекеттерін көрмедім де, естімедім. Мені жанкүйерлер әрқашан сыйлайтын. Сондықтан, ондай қысымшылықты сезінбедім. Сөздің орайы келіп тұрғанда айтайын, шалғай Ақтөбеден келіп, бүгін бізге қолдау көрсеткен барша жанкүйерлерімізге рақметімді айтамын. Барша ақтөбелік жанкүйерлерге зор алғыс.

- Бір аптадан соң өз алаңымыздағы алғашқы ойынды өткіземіз. Қарсыласымыз – шымкенттік "Ордабасы". Үш ұпай олжалай аламыз ба?

- Әрине! Бастысы, бас бапкердің нұсқауларын дұрыс орындасақ, жеңіске жету үшін сол жеткілікті деп ойлаймын. Себебі, бапкер команданың әлсіз және мықты тұстарын әбден зерттеп, бізге дұрыс бағыт беріп отырады. Ертеңнен бастап сол ойынға дайындалатын боламыз.

Әлеуметтік желілерде бөлісу