UFC ойнағанда МакГрегорды таңдаймын - Димаш Құдайберген

Димаш Құдайберген қонақ болған "Түнгі студия" бағдарламасына АҚШ-тан, Германиядан және Қытайдан тыңдармандары келді, - деп хабарлайды Теngrinews.kz тілшісі.

"Қазақстан" телеарнасынан эфир 6 шілдеде кешкі уақытта көрсетілді. Әнші бұл бағдарламаға осымен екінші рет келіп отыр. "Түнгі студияға" әнші 2015 жылы келген еді. Айта кетейік, сол кезде әртіс мұндай танымал болмаған еді. Димаш Құдайберген I am Singer конкурсына қатысқаннан кейін әлемдік деңгейдегі әншіге айналды. Бұл жолы әншіні көру үшін ток-шоуға АҚШ-тың Аризона штатынан, Германиядан және Қытайдан келді.

Димаш Құдайбергеннің айтуынша, қытайлық конкурсқа қатысқанына жарты жыл болыпты. "Бұл конкурстың маған қандай сезім, қандай әсер бергенін сөзбен айту қиын. Себебі әрбір тур, әрбір концерт мен үшін өте маызды әрі өмірімдегі бақытты сәт болды. Бұл конкурсқа жақсылап дайындалдым. Уайымдағанымды жасырмаймын. Себебі бүкіл қазақтың атынан өнер көрсету мен үшін жауапты іс болды. Сонымен қатар, шетелде тыңдармандарымды таптым, олардың талабы мен талғамына сай болуға тура келді", - деді әнші.



Димаштың айтуынша, ол бала кезінен конкурстарға қатысқан, бастапқыда оның шашы ұзын болыпты. Әнші жыл сайын стилистердің оның шашын қысқартып келе жатқанын айтты. "Білмеймін, үш-төрт жылдан кейін тіпті де таз болатын шығармын", - деп әзілдеді ол.

Сонымен қатар, әртіс Instagram ароқылы көрермендердің сұрағына жауап берді. Алайда Димаш даусының қанша октава екенін құпия қалдырды. Залда отырған қытайлық қыз жанкүйерлерінен есте қалған қандай сыйлық алғаны жайлы қазақ тілінде сұрады. Әнші ең кішкентай сыйлықтың өзі құнды екенін айтып өтті.



Айтпақшы, Димаш Playstation арқылы FIFA және UFC ойындарын ойнағаны жақсы көретінін айтты. "PES ойнағым келмейді. FIFA ойнағанда, "Челсиді" таңдаймын, ал UFC ойнағанда - МакГрегор", - деді ол.



Әнші шетелдік тыңдармандарымен еркін байланысқа түсу үшін бірнеше тілді меңгеруді армандайтынын айтты. Болашақта тіпті рэп те оқуы мүмкін екенін жасырмады. Ал бағдарлама соңында ол қазақ тілінде ән орындады.