"Бұл қиындықты бүкіл ел болып жеңеміз де, алтын аламыз". Ильин денсаулығы мен Токио олимпиадасына қатысты

Сурет: instagram.com/ilyailyinforever

Қазақстандық ауыр атлет Илья Ильин Instagram желісі арқылы денсаулық жағдайы мен алдағы Токио Олимпиадасына жоспары туралы айтып берді, - деп хабарлайды Vesti.kz.

Спортшының сөзінше, омыртқасының саулығында айтарлықтай қиындықтар бар. Алайда ол спортшы ретінде қарапайым адамға зиян деп көрсетілген физикалық жаттығулар жасай бермек.

"Дәрігердің қабылдауында болдым - сөйлестік. Менің омыртқамда айтарлықтай үш проблема бар. Мен бұл туралы арнайы пост жазатын шығармын, ойлану керек. Алайда талмай еңбек ету қажет... Қарапайым адамға бұлай істеуге болмайды, бірақ маған болады, себебі менің мақсатым бар және сол мақсатқа жетуім керек. Ең болмағанда соған жетіп, жақсылап өнер көрсетуім қажет. Бір ай физиотерапия, емделу, зілтемірсіз дайындықтар жүргізу керектігін айтты. Кейінірек ауыр атлетика жаттығуларын орындауыма болады екен. Мен онымен бұл мәселеде келісемін, үлкен алғыс оған, жақсы жігіт өзі. Мен спортшымын, сол себепті ары қарай жылжуым керек. Шындап келгенде айтарлықтай мәселелер бар.

Барлығы да жақсы, менің командам мен әріптестерім жақсы. Олар маған барынша көмектеседі. Бүкіл ел болып осы қиындықтарды өткеріп, алтын медальді иеленіміз. Мен үшін алаңдап жатқандарыңыз үшін алғыс білдіремін. Мен оны сезінемін. Бұл мен үшін қымбат! Асықпай, аптықпай Токио Олимпиадасына жылжимыз", - деді Ильин.

Еске салайық, Ильин Ашхабадта өткен әлем біріншілігіне қатысу керек болатын. Алайда омыртқасындағы жарақат салдарынан одан бас тартты. Бұл 2008 және 2012 жылғы Олимпиада жүлдесінен айырылуға себеп болған допинг дауынан кейін, екі жылдан бергі алғашқы әлемдік жарыс болу керек еді.

Әлеуметтік желілерде бөлісу