"Қайсар" ресейлік клубты жеңді

Түркиядағы оқу-жаттығу жиындарында Қазақстан премьер-лигасындағы екі клуб Ұлттық футбол лигасы (ҰФЛ) - Ресейдің екінші дивизионындағы командалармен кездесу өткізді, - деп хабарлайды Vesti.kz.

Қызылордалық "Қайсар" 2:0 есебімен "Ертістің" бұрынғы бапкері Дмитрий Черышев жаттықтыратын "Нижний Новгород" клубын ұтты. Бесінші және он төртінші минутта сербиялық форвард Братислав Пуношевац дубль жасады.

"Қайсардың" бірінші таймдағы құрамы: Григоренко, Ламанж, Оршулич, Садовничий, Чуреев, Джошуа, Құрманбекұлы, Байжанов, Нәрзілдаев, Барсегян, Пуношевац.

"Қайсардың" екінші таймдағы құрамы: Исламқұлов, Әмірсейтов, Оршулич, Граф, Гурман, Алтаев, Абзалов (Махан), Тағыберген, Зенькович, Мбамбо, Карлитос.

Ал павлодарлық "Ертіс" петерборлық "Зенитпен" тең ойнады - 2.2. Қазақстан клубында жаңа екі ойыншы көзге түсті - гамбиялық форвард Момоду Сиссей және жартылай қорғаушы Тимур Мульдинов. Екеуі де ҚПЛ-ден шығып қалған "Қызыл-Жар СК" сапында ойнаған.

Айта кетейік, "Нижний Новгород" қысқы үзіліске ҰФЛ-де бесінші болып келді, ал "Зенит-2" соңғы, 20-шы орында.

ҚПЛ-де "Қайсар" бесінші, ал "Ертіс" оныншы болды да, жолдама үшін ойындарда шымкенттік "Қыранды" жеңді.

Әлеуметтік желілерде бөлісу