Қазақстан он жылдықта Еуропаның озық чемпионаттарының ТОП-3 деңгейіне көтерілді

Қазақстан премьер-лигасы Еуропадағы жылдам ілгерлеп келе жатқан чемпионаттардың үздік үштігіне кірді, - деп хабарлайды UEFA.com.

УЕФА мәліметі бойынша, Қазақстан премьер-лигасы 2007 және 2017 жылдар аралығында ұйымның коэффициенттер кестесінде айтарлықтай көтерілген. 45-ші орында болған Қазақстан 16 саты көтеріліп, 29-шы орынға жайғасқан.

Әзірбайжанның жетістігі де осындай - 42-ші орыннан 26-ға көтерілді. Ең жоғары көтерілген Беларусь 21 саты жоғарлап, 21-ші орында.

Ал кері көрсеткіш Литвада - он жылда 33-тен 48-ші орынға сырғыған. Шотландия 12 саты төмендеген, Румыния, Болгария және Латвия - 10 саты.

Айта кетейік, қазіргі таңда Қазақстан УЕФА коэффициенттер кестесінде 24-ші орында және Әзірбайжаннан екі саты жоғары.

Қазақстанның мұндай жетістігіне елдің еурокубоктардағы сәтті ойындары себепші болды. "Астана" үш рет Еуропа лигасының топтық раундында және Чемпиондар лигасының топтық кезеңінде ойнады. Сонымен қатар, былтыр астаналық команда тарихта алғаш еурокубоктардың көктемгі кезеңіне өтті, алайда, португалиялық "Спортингтен" ұтылып қалды.

Әлеуметтік желілерде бөлісу