Мбаппе ПСЖ-дан жеке ұшақ пен ерекше мәртебе талап еткен

Football Leaks порталы Франция құрамасының шабуылшысы Килиан Мбаппе "Пари Сен-Жерменге" ауыспай тұрып қандай талаптар қойғанын әшкере етті.

Басылым ақпаратынша, Мбаппе "Реалға" өтуі мүмкін еді. 2017 жылы мадридтіктер ойыншы үшін "Монакоға" 214 миллион еуро ұсынған, алайда, ол ПСЖ-ны таңдады. Осылайша, париждіктер Мбаппені 180 миллионға сатып алу міндетімен бір жылға жалға алды.

Форвард ПСЖ-дан бес жылға 65 миллион еуро, жеке ұшақпен ұшуды және "Алтын допты" ұтқан жағдайда клубтың ең қымбат ойыншысы атану мәртебесін талап еткені хабарланып отыр.

Сонымен қатар, ол қаржылық фэйр-плейді бұзу себебінен Чемпиондар лигасынан шығып қалған жағдайға өтемақы сұраған.

Бұл талаптардың еңбекақыға қатысты тұсы ғана орындалып, қалғаны толық жасалмаған екен.

Бұл маусымда 19 жастағы Мбаппе ПСЖ үшін 11 гол салды. Жазда ол Франция құрамасы сапында әлем чемпионы атанды.

Ал жақында CIES Football Observatory компаниясының нұсқасы бойынша әлемнің ең қымбат футболшысы атанды. Оны трансферлік құны - 216,5 миллион еуро.

Әлеуметтік желілерде бөлісу