Қарсыласын баспен ұрып, бетіне түкіріп жіберген футболшы ойыннан қуылды

Федерико Ди Франческо және Дуглас Коста (оң жақта). Сурет: Sky Sports

Туриндік "Ювентус" және Бразилия құрамасының жартылай қорғаушысы Дуглас Коста Италия чемпионатының төртінші турындағы "Сассуоло" командасымен ойын (2:1) кезіндегі теріс қылығы үшін кешірім сұрады.

Матч соңында Коста және "Сассуоло" шабуылшысы Федерико Ди Франческомен жанжалдасып қалды. Бразилиялық алдымен қарсыласын шынтақпен ұрып, төрешінің көзінше баспен сүзіп жібергені үшін сары қағаз алды. Коста мұнымен де тынбай, "Сассуоло" ойыншысының бетіне түкіріп жіберді.

Төреші мұны байқамай қалған, алайда, видеоны көргеннен кейін қызыл қағаз көрсетті.

Дуглас Коста, как же это мерзко. Ну зачем!? #ЮвентусСассуоло pic.twitter.com/xD8LrlCrFQ
— Eurosport.ru (@Eurosport_RU) 16 сентября 2018 г.

"Ювентус" жанкүйерлері алдында кешірім сұрағым келеді. Шуақты және басыма бұлт үйірілген заманда да қасымнан табылар командаластарымнан да кешірім сұраймын. Қылығым жиіркенішті болды, сол үшін барлығынынан кешірім өтінем", - деп жазыпты Коста Instagram желісінде.

Football Italia мәліметінше, матчтен кейінгі баспасөз мәслихатында "Ювентустің" бас бапкері Массимилиано Аллегри клуб бұл қылығы үшін Костаға айыппұл салатынын мәлімдеген. Сонымен қатар, бразилиялық бес ойыннан шеттеледі.