Сарбаз қыз ММА чемпионы атанды

Сурет "Шығыс" өңірлік қолбасшылығы баспасөз қызметінен

Алматы қаласының "Almaty Arena" көпфункционалды спорт кешенінде Қазақстанның жауынгерлік өнер Ассоциациясы және Қазақстанның біріккен федерациялар ассоциациясы өткізген ММА-дан Қазақстан біріншілініің чемпионатында 56,7 салмақ дәрежесінде "Шығыс" өңірлік қолбасшылығы 44736 әскери бөлімінің сержанты Жәкенова Әсем жеңімпаз атанды.

Чемпионатқа облыстық деңгейдегі іріктеуден өткен, еліміздің түкпір-түкпірінен жиналған 230 мықты спортшылар қатысты. Ең үздікті анықтау үшін спортшыларымыз төрт күн бақ сынасты.

Сержант Жәкенова Әсем финалда табандылық танытып, шайқастың аяқталуына дейін қарсыласын ауырту тәсілін пайдаланып жеңіске жетті. Айта кетсек, финалда Әсем ШҚО атынан қатысқан Дарина Абылазовамен кездесті.

MMA (аралас жекпе-жек) - 1995 жылы құрылған салыстырмалы түрде жаңа спорт. ММА - жекпе-жек күрестері үшін тиімді техника элементтері, мектептері мен бағыттарын біріктіретін спорттың бірегей түрі. Ол Қазақстан Республикасында 2013 жылғы 26 маусымда спорттың ресми түрі ретінде танылды.

Еске салайық, сержант Жакенова қол күресінен спорт шебері, дзюдо және самбодан спорт шеберіне үміткер. Оның есебінде 10 рет парашюпен секіру бар. Ол таулы және су асты дайындық курстарынан өткен, әскери-қолданбалы спорт түрлерінен бірнеше дүркін Қарулы Күштердің чемпионы. 2016 жылы Отан қорғаушылар күні қарсаңында Жакенова Қазақстан Республикасының Президенті Нұрсұлтан Назарбаевтың қолынан "Жауынгерлік ерлігі үшін" медалімен марапатталды.

Биыл ол "Бейбітшілік жауынгері" конкурсында "Шығыс" өңірлік қолбасшылығының іріктеу жарыстарының жеңімпазы атанып, қазір АрМИ-2019-ға қатысу үшін республикалық іріктеу турниріне дайындалып жатыр.